ຫວຽດນາມຊ່ວຍຍົກລະດັບພະນັກງານຫລັກແຫລ່ງໂຄສະນາອົບຮົມຂອງລາວ

ລາຍລະອຽດ

ສ້າງຂື້ນເມື່ອ ວັນພຸດ, 20 ກັນຍາ 2023 02:24

ຂຽນໂດຍ ນາງ ນິກອນ ໄມຂະມຸວົງ

      ໃນວັນທີ​ 15​ ​ກັນຍາ​ 2023 ທີ່ຜ່ານມາ, ສະຖາບັນການເມືອງແຫ່ງຊາດ​ໂຮ່ຈີມິນ,​ ສສ ຫວຽດນາມ​ ໄດ້ເປີດຊຸດບໍາລຸງວຽກງານໂຄສະນາອົບຮົມໃຫ້ແກ່ພະນັກງານຫລັກແຫລ່ງ​ ຂອງ​ ສປປ​ ລາວ​ ປະຈໍາປີ​ 2023​ ​ຢ່າງເປັນທາງການ;​ ເປັນກຽດເຂົ້າຮ່ວມໂດຍ​ ສະຫາຍ​ ຮສຈ.ປອ ເຢືອງ​ຈູງອີ ຮອງຫົວໜ້າສະຖາບັນການເມືອງແຫ່ງຊາດໂຮ່ຈີມິນ,​ ມີບັນດາສະຫາຍຕາງໜ້າສະຖານທູດລາວປະຈໍາ ສສ​ ​ຫວຽດນາມ,​ ຕາງໜ້າຄະນະຈັດຕັ້ງສູນກາງພັກ,​ ຄະນະພົວພັນການຕ່າງປະເທດ,​ ແຂກຖືກເຊີນ,​ ພາກສ່ວນກ່ຽວຂ້ອງ​ພ້ອມດ້ວຍນັກຝຶກອົບຮົມເຂົ້າຮ່ວມຢ່າງພ້ອມພຽງ.

   ນັກຝຶກອົບຮົມທີ່ເຂົ້າຮ່ວມໃນຄັ້ງນີ້,​ ມີທັງໝົດ​ 15​ ສະຫາຍ,​ ຍິງ​ 4​ ສະຫາຍ,​ ຈາກ​ຄະນະໂຄສະນາອົບຮົມສູນກາງພັກ​ 2​ ສະຫາຍ,​ ຍິງ​ 1,​ ສະຖາບັນການເມືອງ-ການປົກຄອງແຫ່ງຊາດ​ 1​ ​ສະຫາຍ,​ ຄະນະໂຄສະນາອົບບັນດາແຂວງ​ 12​ ສະຫາຍ,​ ຍິງ​ 3​ ສະຫາຍ.​ ຊຶ່ງນໍາພາຄະນະໂດຍ​ ສະຫາຍ​ ອຸດອນ​ ສອນສຸລິນ​ ກໍາມະການພັກແຂວງ,​ ຫົວໜ້າຄະນະໂຄສະນາອົບຮົມແຂວງບໍລິຄໍາໄຊ.​

      ການຝຶກອົບຮົມຄັ້ງນີ້​ ຕົ້ນຕໍແມ່ນເລັ່ງໃສ່ດ້ານທິດສະດີ​ລວມມີ​ 25 ຫົວຂໍ້​ ​ຊຶ່ງນໍາສະເໜີໂດຍ​ ບັນດາສະຫາຍການນໍາ​, ຄູອາຈານ​ຈາກສໍານັກງານ-ສະຖາບັນຕ່າງໆທີ່ປ່ຽມລົ້ນໄປດ້ວຍປະສົບການຄວາມຊໍານານໃນໜ້າທີ່ວຽກງານທີ່ອຸດົມສົມບູນ; ການຝຶກອົບຮົມຄັ້ງນີ້​ ຈະໄດ້ດໍາເນີນເປັນເວລາ​ 2 ​ເດືອນ​ ຈຶ່ງຈະສໍາເລັດ.

ຊຸດອົບຮົມ ໃຫ້ມະຫາຊົນກ້າວໜ້າ ຊຸດທີ II ປີ 2023

ລາຍລະອຽດ

ສ້າງຂື້ນເມື່ອ ວັນຈັນ, 18 ກັນຍາ 2023 02:58

ຂຽນໂດຍ ນາງ ນິກອນ ໄມຂະມຸວົງ

       ໃນວັນທີ 06 ກັນຍາ 2023 ຢູ່ທີ່ຫ້ອງປະຊຸມເບີ 02 ຂອງຫ້ອງວ່າການແຂວງ ຄະນະໂຄສະນາອົບຮົມແຂວງ ໄດ້ເປີດຊຸດອົບຮົມໃຫ້ມະຫາຊົນຜູ້ກ້າວໜ້າ ທີ່ຈະຂະຫຍາຍເຂົ້າເປັນສະມາຊິກພັກປະຊາຊົນ ປະຕິວັດລາວ ຊຸດທີ II ປີ 2023 ຂຶ້ນ, ໃຫ້ກຽດເປັນປະທານ ແລະ ບັນຍາຍເອກະສານໃນຄັ້ງນີ້ໂດຍ ສະຫາຍ ນ ສຸດສະດາ ໂສພາ ເລຂາໜ່ວຍພັກ, ຮອງຫົວໜ້າຄະນະໂຄສະນາອົບຮົມແຂວງ, ມີມະຫາຊົນກ້າວໜ້າ ມາຈາກຄະນະພັກຮາກຖານ, ໜ່ວຍພັກຮາກຖານ ອ້ອມຂ້າງແຂວງ ເຂົ້າຮ່ວມທັງໝົດ 23 ສະຫາຍ, ຍິງ 15 ສະຫາຍ.

     ຈຸດປະສົງໃນການເປີດຊຸດອົບຮົມໃນຄັ້ງນີ້ ແມ່ນເພື່ອເຮັດໃຫ້ມະຫາຊົນຜູ້ກ້າວໜ້າ ທີ່ຈະຂະຫຍາຍເຂົ້າພັກເປັນສະມາຊິກພັກ ຮັບຮູ້-ເຂົ້າໃຈ ເບື້ອງຕົ້ນກ່ຽວກັບປະຫວັດ, ຄວາມເປັນມາ, ອຸດົມການ ແລະ ທາດແທ້ຂອງພັກປະຊາຊົນປະຕິວັດລາວ ເຂົ້າໃຈກ່ຽວກັບມາດຕະຖານ, ເງື່ອນໄຂຜູ້ທີ່ຈະເຂົ້າເປັນສະມາຊິກພັກ ແລະ ຜົນປະໂຫຍດທີ່ສະມາຊິກພັກໄດ້ຮັບ.

     ບົນພຶ້ນຖານຄວາມຮັບຮູ້-ເຂົ້າໃຈດັ່ງກ່າວ ເຮັດໃຫ້ມະຫາຊົນຜູ້ກ້າວໜ້າ ຕັ້ງໜ້າຝຶກຝົນຫຼໍ່ຫຼອມຕົນເອງ ໃຫ້ມີມາດຖານ, ເງື່ອນໄຂຄົບຖ້ວນ ແລະ ມີຄວາມຕື່ນຕົວສະໝັກໃຈ ເຂົ້າເປັນສະມາຊິກພັກປະຊາຊົນ ປະຕິວັດລາວ ເພື່ອເພີ່ມພະລັງແຮງໃຫ້ແກ່ພັກນັບມື້ນັບຫຼາຍຂຶ້ນ.

     ຊຸດອົບຮົມດັ່ງກ່າວ ໄດ້ຄົ້ນຄວ້າ-ເຊື່ອມຊຶມ ເອກະສານ ຈໍານວນ 13 ຄໍາຖາມ-ຄໍາຕອບ.

      ໃນຕອນທ້າຍຂອງຊຸດອົບຮົມ ຍັງໄດ້ຮັບກຽດຟັງການໂອ້ລົມຂອງ ສະຫາຍ ນ ສຸດສະດາ ໂສພາ ເລຂາໜ່ວຍພັກ, ຮອງຫົວໜ້າຄະນະໂຄສະນາອົບຮົມແຂວງ, ເຊິ່ງທ່ານໄດ້ເນັ້ນໜັກໃຫ້ ມະຫາຊົນຜູ້ກ້າວໜ້າທຸກສະຫາຍ ຈົ່ງຕັ້ງໜ້າຝຶກຝົນຫຼໍ່ຫຼອມຕົນເອງ ໃຫ້ກາຍເປັນຜູ້ທີ່ດີເດັ່ນໃນທຸກຂະບວນການຂອງວຽກງານ, ມີມາດຖານ ແລະ ເງື່ອນໄຂຄົບຖ້ວນ ເພື່ອເຂົ້າເປັນສະມາຊິກພັກປະຊາຊົນປະຕິວັດລາວ.

ຊຸດອົບຮົມໃຫ້ແກ່ຄະນະຮັບຜິດຊອບວຽກງານການເມືອງ-ແນວຄິດ ແລະ ຕິດຕາມ, ເກັບກໍາສະພາບແນວຄິດ-ຫາງສຽງສັງຄົມຢູ່ເມືອງປາກກະດິງ

ລາຍລະອຽດ

ສ້າງຂື້ນເມື່ອ ວັນພຸດ, 30 ສິງຫາ 2023 04:08

ຂຽນໂດຍ ນາງ ນິກອນ ໄມຂະມຸວົງ

          ເພື່ອສ້າງຂີດຄວາມສາມາດ ໃຫ້ຄະນະຮັບຜິດຊອບວຽກງານການເມືອງ-ແນວຄິດ ແລະ ສັງລວມ-ຫາງສຽງສັງຄົມຢູ່ຂັ້ນເມືອງ ໃຫ້ມີຄວາມໜັກແໜ້ນ-ເຂັ້ມແຂງ.

          ໃນວັນທີ 28-29 ສິງຫາ 2023 ຄະນະໂຄສະນາອົບຮົມເມືອງປາກກະດິງ ໄດ້ເປີດຊຸດອົບຮົມວຽກງານການເມືອງ-ແນວຄິດ ແລະ ສັງລວມ-ຫາງສຽງສັງຄົມຂຶ້ນ ໂດຍການເປັນປະທານຂອງ ທ່ານ ພູເຂົາເງິນ ອິນທະວົງ ກໍາມະການພັກແຂວງ, ເລຂາພັກເມືອງ, ເຈົ້າເມືອງປາກກະດິງ, ເປັນກຽດເຂົ້າຮ່ວມຂອງທ່ານ ອຸດອນ ສອນສຸລິນ ກໍາມະການພັກແຂວງ, ຫົວໜ້າຄະນະໂຄສະນາອົບຮົມແຂວງ. ມີຄະນະຮັບຜິດຊອບວຽກງານການເມືອງ-ແນວຄິດ ແລະ ຕິດຕາມ, ເກັບກໍາສະພາບແນວຄິດ-ຫາງສຽງສັງຄົມຂັ້ນເມືອງ  ແລະ ບ້ ານ ເຂົ້າຮ່ວມ 53 ທ່ານ, ຍິງ 09 ທ່ານ; ຊຸດອົບຮົມດັ່ງກ່າວ ໄດ້ເຜີຍແຜ່-ເຊື່ອມຊຶມບັນດານິຕິກໍາທີ່ກ່ຽວຂ້ອງ ແລະ ບົດຮຽນ 04 ບົດ ຄື:

-   ຄໍາສັ່ງຂອງຄະນະເລຂາທິການສູນກາງພັກ ເລກທີ 04/ຄລສພ, ລົງວັນທີ 10 ກໍລະກົດ 2017 ວ່າດ້ວຍການເພີ່ມທະວີວຽກງານຕິດຕາມ, ເກັບກໍາສະພາບແນວຄິດ-ຫາງສຽງສັງຄົມໃນໄລຍະໃໝ່.

-   ຄຳແນະນໍາຂອງຄະນະໂຄສະນາອົບຮົມສູນກາງພັກ ສະບັບເລກທີ 08/ຄອສພ, ລົງວັນທີ 31 ກໍລະກົດ 2017 ກ່ຽວກັບການຈັດຕັ້ງປະຕິບັດຄໍາສັ່ງຂອງຄະນະເລຂາທິການສູນກາງພັກ ເລກທີ 04/ຄລສພ.

         ບົດຮຽນທີ 01: ບັນຫາພື້ນຖານກ່ຽວກັບວຽກງານຫາງສຽງສັງຄົມ.

ບົດຮຽນທີ 02: ວິທີການເກັບກຳ ແລະ ນໍາໃຊ້ຫາງສຽງສັງຄົມເຂົ້າໃນວຽກງານການເມືອງ-ແນວຄິດ.

ບົດຮຽນທີ 03: ຕາໜ່າງເພື່ອນຮ່ວມງານ.

ບົດຮຽນທີ 04 ວຽກງານຄົ້ນຄວ້າ-ສັງລວມ.

ໃນຕອນທ້າຍຂອງຊຸດອົບຮົມ ຍັງໄດ້ຮັບກຽດຟັງການໂອ້ລົມຂອງ ທ່ານ ອຸດອນ ສອນສຸລິນ ກໍາມະການພັກແຂວງ, ຫົວໜ້າຄະນະໂຄສະນາອົບຮົມແຂວງ ເຊິ່ງທ່ານໄດ້ຊີ້ໃຫ້ເຫັນເຖິງຄວາມສໍາຄັນຂອງວຽກງານດັ່ງກ່າວ ແມ່ນວຽກງານທີ່ຈໍາເປັນ ຕໍ່ບົດບາດການນໍາພາ-ຊີ້ນໍາຂອງພັກ, ເຊິ່ງທ່ານໄດ້ຮຽກຮ້ອງໃຫ້ການນໍາຂອງເມືອງ ພ້ອມດ້ວຍ ຄະນະຮັບຜິດຊອບຂັ້ນເມືອງ ໃຫ້ເອົາໃຈໃສ່ນໍາພາ-ຊີ້ນໍາ, ການຄຸ້ມຄອງຂອງລັດ ແລະ ເພີ່ມທະວີຄວາມຮັບຜິດ ຊອບຂອງຕົນ ເຄື່ອນໄຫວວຽກງານດັ່ງກ່າວ ໃຫ້ມີຄວາມໜັກແໜ້ນ-ເຂັ້ມແຂງ, ເຮັດໃຫ້ບັນດາຫາງສຽງສັງຄົມ ໄດ້ຮັບການແກ້ໄຂທ່ວງທັນສະພາບການ ແລະ ຖືກຕ້ອງ-ສອດຄ່ອງກັບລະບຽບກົດ  ໝາຍ, ເພື່ອໃຫ້ສັງຄົມມີຄວາມສະຫງົບ ແລະ ປະຊາຊົນມີຄວາມເຊື່ອໝັ້ນຕໍ່ການນໍາພາຂອງພັກ-ລັດເຮົາ.

ປະທານ ຄໍາໄຕ ສີພັນດອນ: ຊີວິດນີ້ ເພື່ອຄວາມເປັນເອກະລາດ, ຄວາມມັ່ງຄັ່ງງເຂັ້ມແຂງ, ຄວາມຈະເລີນພັດທະນາຂອງປະເທດ ຊາດ ແລະ ເພື່ອຄວາມຢູ່ດີກິນດີ ຮັ່ງມີຜາສຸກຂອງປະຊາຊົນລາວ ບັນດາເຜົ່າ.

ລາຍລະອຽດ

ສ້າງຂື້ນເມື່ອ ວັນອັງຄານ, 15 ສິງຫາ 2023 03:40

ຂຽນໂດຍ ນາງ ນິກອນ ໄມຂະມຸວົງ

     ເນື່ອງໃນໂອກາດສະເຫຼີມສະຫຼອງເນື່ອງໃນໂອກາດ ວັນເກີດ ປະທານ ຄໍາໄຕ ສີພັນດອນ ຄົບຮອບ 100 ປີ ( 08/02/1924-08/02/2024 ) 

     ຄະນະໂຄສະນາອົບຮົມແຂວງ ບໍລິຄໍາໄຊ ໄດ້ນໍາເອົາບົດຂຽນ ຂອງ ທ່ານ ຄໍາພັນ ເຜີຍຍະວົງ ເລຂາທິການສູນກາງພັກ, ຫົວໜ້າຄະນະໂຄສະນາອົບຮົມສູນກາງພັກ, ປະທານສະພາທິດສະດີສູນກາງພັກ ຫົວຂໍ້: ຊີວິດນີ້ ເພື່ອຄວາມເປັນເອກະລາດ, ຄວາມມັ່ງຄັ່ງເຂັ້ມແຂງ, ຄວາມຈະເລີນພັດທະນາຂອງປະເທດຊາດ ແລະ ເພື່ອຄວາມຢູ່ດີກິນດີ ຮັ່ງມີຜາສຸກຂອງປະຊາຊົນລາວ ບັນດາເຜົ່າ ເຊິ່ງໄດ້ຂຽນເນື່ອງໃນໂອກາດ ວັນເກີດ ປະທານ ຄໍາໄຕ ສີພັນດອນ ຄົບຮອບ 99 ປີ ມານໍາສະເໜີໃຫ້ທ່ານຜູ້ອ່ານ ເຊິ່ງມີເນື້ອໃນດັ່ງນີ້: 

   ຊາດລາວເຮົາ ຖືກຂະໜາມນາມເປັນຊາດວິລະຊົນ, ຄົນລາວພິລາດອາດຫານ ດ້ວຍມູນເຊື້ອແຫ່ງການຕໍ່ສູ້ເພື່ອປົກປັກຮັກສາ ແລະ ສ້າງສາປະເທດຊາດມາເປັນພັນປີ.

          ປະເທດລາວ ມີທີ່ຕັ້ງອັນສຳຄັນທາງດ້ານຍຸດທະສາດ ໃນພາກພຶ້ນອາຊີອາຄະເນ ກໍຄື ໃນແຫຼມອິນດູຈີນ. ມີພູມສັນຖານອັນສະຫຼັບສັບຊ້ອນດ້ວຍພູຜາປ່າດົງ, ທົ່ງພຽງ ແລະ ພູພຽງ, ແມ່ນ້ຳລຳເຊ ແລະ ຫ້ອຍຮ່ອງໜອງບຶງ, ທັງມີອານາເຂດຕິດຈອດກັບຫຼາຍປະເທດໃກ້ຄຽງເຊັ່ນ: ທິດຕາເວັນອອກມີສາຍພູຫຼວງຍາວຢຽດເປັນແລວເໝືອນດັ່ງຮົ້ວ ຂັ້ນກັບ ສສ ຫວຽດນາມ; ທາງຕາເວັນຕົກມີແມ່ນ້ຳຂອງ ແລະ ພື້ນທີ່ທາງບົກເປັນຊາຍແດນຕິດຈອດກັບລາຊະອານາຈັກໄທ ແລະ ສະຫະພາບມຽນມາ; ທາງທິດໃຕ້ຕິດກັບລາຊະອານາຈັກກຳປູເຈຍ ແລະ ທາງເໜືອຕິດກັບ ສປ ຈີນ ຊຶ່ງມີຍອດອູຢູ່ແຂວງຜົ້ງສາລີ ເປັນຈຸດສຸດຍອດແຫ່ງອານາເຂດ.

          ຊາດລາວ ປະກອບດ້ວຍຫຼາຍຊົນເຜົ່າທີ່ດຳລົງຊີວິດຢູ່ຮ່ວມກັນ ດ້ວຍຄວາມສາມັກຄີປອງດອງເປັນປຶກແຜ່ນມາຕັ້ງແຕ່ໃດໆ,​ ໄດ້ພ້ອມກັນຕໍ່ສູ້-ສ້າງສາດ້ວຍຄວາມທໍລະຫົດອົດທົນ ແລະ ພິລາດອາດຫານມາຕັ້ງແຕ່ສະໄໝກໍ່ສ້າງອານາຈັກລາວລ້ານຊ້າງອັນກວ້າງໃຫຍ່ເຂັ້ມແຂງ ຈົນຮອດສະໄໝການຕໍ່ສູ້ກູ້ຊາດ ຕ້ານຈັກກະພັດລ່າເມືອງຂຶ້ນທັງແບບເກົ່າ-ແບບໃໝ່ ແລະ ລະ ບອບສັກດີນາປະຕິການ ດ້ວຍໄຊຊະນະອັນຍິ່ງໃຫຍ່, ສາມາດສະຖາປານາ ສາທາລະນະລັດ ປະຊາທິປະໄຕ ປະຊາຊົນລາວ ເປັນລັດໜຶ່ງທີ່ມີຄວາມເປັນເອກະລາດ, ເອກະພາບ ແລະ ມີອຳນາດອະທິປະໄຕອັນຄົບຖ້ວນ.

          ສະເພາະ ແຂວງຈຳປະສັກ ຊຶ່ງເປັນຖິ່ນກຳເນີດຂອງ ປະທານ ຄຳໄຕ ສີພັນດອນ  ກໍເປັນແຂວງທີ່ມີພູຜາປ່າດົງ ແລະ ທົ່ງພຽງກວ້າງໃຫຍ່ ແລະ ເປັນເຂດທີ່ມີທິວທັດສວຍງາມເຊັ່ນ: ແກ້ງຫຼີຜີ, ນ້ຳຕົກຕາດຄອນພະເພັງ, ວັດພູຈຳປາສັກ ແລະ ອື່ນໆ. ແຂວງຈຳປາສັກ ກໍຄື ແຂວງອື່ນໆຂອງປະເທດເຮົາ, ເມື່ອພວກລ່າເມືອງຂຶ້ນຝຣັ່ງເຂົ້າມາຮຸກຮານ ຢຶດຄອງ ພວກເຂົາໄດ້ດຳເນີນການປົກຄອງແບບກົດຂີ່ ແລະ ແບ່ງແຍກ, ບັງຄັບໃຫ້ປະຕິບັດລະບອບການເສຍສ່ວຍ,​ ການເກນໄປເປັນກຸລີ ແລະ ອື່ນໆ ອັນເປັນສາເຫດໃຫ້ຄົນລາວກຽດຊັງ, ຄຽດແຄ້ນ ແລະ ເກີດມີຂະບວນການຕໍ່ສູ້ຕ້ານກັບພວກລ່າເມືອງຂຶ້ນຝຣັ່ງ ຢູ່ພູພຽງໂບລະເວນ ພາຍໃຕ້ການບັນຊາຂອງອົງແກ້ວ ແລະ ອົງກົມມະດຳ ທີ່ແກ່ຍາວກວ່າ 30 ປີ.

       ຈາກສະພາບລວມຄືແນວນັ້ນ ບໍ່ພຽງແຕ່ສົ່ງຜົນກະທົບເຖິງຊາຕາກຳຂອງຊາດລາວ ແຕ່ຍັງສົ່ງຜົນກະທົບເຖິງແຕ່ລະບ້ານ, ແຕ່ລະຄອບຄົວ ແລະ ສ່ວນຕົວຂອງ ປະທານ ຄຳໄຕ ສີພັນດອນ.

          ປະທານ ຄຳໄຕ ສີພັນດອນ ເກີດໃນວັນທີ 08 ກຸມພາ 1924 ທີ່ບ້ານຫົວໂຂງພະໃຫຍ່, ເມືອງໂຂງ, ແຂວງຈຳປາສັກ. ໂດຍກໍາເນີດຈາກຄອບຄົວຊາວນາທີ່ມີມູນເຊື້ອຮັກຊາດ, ສົມທົບກັບການໄດ້ຮັບຜົນສະທ້ອນຈາກມູນເຊື້ອແຫ່ງການຕູ້ສູ້ອັນເດັດດ່ຽວ, ເດັດຂາດບໍ່ຍອມຈໍານົນຂອງປະຊາຊົນລາວບັນດາເຜົ່າຕ້ານພວກສັກດິນາລ່າເມືອງຂຶ້ນຜູ້ຮຸກຮານ; ຜ່ານການສຶກສາຮໍ່າ ຮຽນ, ຜ່ານການສໍາຜັດກັບຊີວິດຕົວຈິງຂອງສັງຄົມເມືອງຂຶ້ນ-ສັກດີນາ, ປະທານຄໍາໄຕ ສີພັນດອນ ຮັບຮູ້ເຖິງຄວາມຂົມຂືນຂອງຊາດທີ່ສູນເສຍເອກະລາດ, ເຂົ້າໃຈເລິກເຊິ່ງເຖິງຄວາມເຈັບຊໍ້າ ຂອງປະຊາຊົນລາວບັນດາເຜົ່າທີ່ຕົກເປັນຂ້ອຍຂ້າ ໄດ້ເຮັດໃຫ້ປະທານ ຈາກຈິດໃຈຊາດທີ່ໄດ້ບົ່ມເພາະຢູ່ໃນໃຈມາຕັ້ງແຕ່ເຍົາໄວ ໄດ້ກ້າວໄປສູ່ລັດທິຮັກຊາດ ແລະ ໄດ້ເດີນເຂົ້າສູ່ເສັ້ນທາງຕໍ່ ສູ້ຂອງປະຊາຊົນລາວບັນດາເຜົ່າຕ້ານພວກລ່າເມືອງຂຶ້ນຜູ້ຮຸກຮານ, ເພື່ອກອບກູ້ເອກະລາດ ແລະ ອິດສະຫຼະພາບມາໃຫ້ປະ ເທດຊາດ ແລະ ປະຊາຊົນເຮົາ. ຜ່ານຂະບວນວິວັດແຫ່ງການຕໍ່ສູ້ປະຕິວັດຂອງປະຊາຊົນເຮົາ ແລະ ຂະບວນວິວັດແຫ່ງການຮ່ວມສໍາພັນສູ້ຮົບລະຫວ່າງ ລາວ-ຫວຽດນາມ-ກໍາປູເຈຍ; ດ້ວຍການສົມທົບຢ່າງສະໜິດແໜ້ນລະຫວ່າງ ນໍ້າໃຈຮັກຊາດ ອັນດູດດື່ມ ກັບນໍ້າໃຈສາກົນກໍາມະຊີບອັນຜ່ອງໃສ, ປະທານຍິ່ງຮັບຮູ້ເຂົ້າໃຈແຈ້ງເຖິງບົດບາດອັນສໍາຄັນຂອງຊົນຊັ້ນກໍາມະກອນ ທີ່ເປັນຊົນຊັ້ນນໍາໜ້າ ຂອງຍຸກສະໄໝ ແລະ ຈາກຄວາມຕື່ນຕົວຮັກຊາດ ປະທານໄດ້ກ້າວໄປເຖິງການມີສະຕິຕື່ນຕົວທາງຊົນຊັ້ນ, ໂດຍໄດ້ຢືນຢູ່ໃນຖັນແຖວຂອງຊົນຊັ້ນກໍາມະກອນ, ຂອງປະຊາຊົນຜູ້ອອກແຮງານລາວບັນດາເຜົ່າ, ຂອງການປະຕິວັດລາວ ແລະ ຂອງຊາດລາວໃນປະຈຸບັນ. ໃນຊີວິດແຫ່ງການເຄື່ອນໄຫວປະຕິວັດ, ປະທານໄດ້ຜ່ານຜ່າຄວາມທຸກຍາກລໍາບາກ, ຜ່ານຜ່າການທົດສອບທີ່ສັບສົນຫຍຸ້ງຍາກຕ່າງໆນາໆ, ບາງຄັ້ງເຖິງຂັ້ນເກືອບຈະເອົາຊີວິດບໍ່ລອດ,​ແຕ່ເຖິງຈະຢູ່ໃນສະພາບການໃດ, ເວ ລາໃດປະທານກໍ່ມີຄວາມໜັກແໜ້ນທາງດ້ານການເມືອງ, ມີສະຕິຮັບຜິດຊອບຕໍ່ການຈັດຕັ້ງ, ມີຄວາມເດັດດ່ຽວໜຽວແໜ້ນຕໍ່ໜ້າທີ່ວຽກງານທີ່ໄດ້ຮັບມອບໝາຍ ແລະ ມີຄວາມເດັດຂາດຕໍ່ສັດຕູ.

     ໃນຊຸມປີຕົ້ນແຫ່ງການຕໍ່ຕ້ານ, ຢູ່ໃນເງື່ອນໄຂທີ່ມີແຕ່ສອງຝາມືເປົ່າ, ແຕ່ດ້ວຍຄວາມເຊື່ອໝັ້ນຢ່າງໜັກແໜ້ນຕໍ່ປະຊາ ຊົນ, ເຊື່ອໝັ້ນໃນກໍາລັງແຮງອັນມະຫາສານຂອງປະຊາຊົນ, ຮູ້ອີງໃສ່ປະຊາຊົນ ແລະ ປຸກລະດົມປະຊາຊົນເຂົ້າ ຮ່ວມການຕໍ່ຕ້ານ, ປະທານ ຄໍາໄຕ ສີພັນດອນ ໄດ້ນໍາພາ ກໍ່ສ້າງຮາກຖານການເມືອງ, ກໍ່ສ້າງເຂດທີ່ໝັ້ນຕໍ່ຕ້ານຢູ່ເຂດ ໃຕ້ລາວສໍາເລັດຜົນ. ຕໍ່ມາເມື່ອຂະບວນການຕໍ່ຕ້ານຢູ່ເຂດກາງປະສົບກັບຄວາມຫຍຸ້ງຍາກ, ປະທານໄດ້ນາໍໃຊ້ບົດຮຽນການກໍ່ສ້າງຮາກຖານການເມືອງ ກໍ່ ສ້າງເຂດທີ່ໝັ້ນຕໍ່ຕ້ານຢູ່ເຂດໃຕ້, ເພື່ອປັບປຸງຟື້ນຟູຂະບວນການຕໍ່ຕ້ານຢູ່ເຂດກາງ ເຮັດໃຫ້ຂະບວນການຕໍ່ຕ້ານຢູ່ເຂດກາງຫຼຸດພົ້ນອອກຈາກສະພາວະຫຍຸ້ງຍາກ ແລະ ສືບຕໍ່ຂະຫຍາຍຕົວ, ຜົນສໍາເລັດໃນ ການກໍ່ສ້າງເຂດທີ່ໝັ້ນຕໍ່ຕ້ານຢູ່ເຂດໃຕ້ ແລະ ເຂດກາງ, ເປັນຜົນສໍາເລັດທີ່ມີຄວາມໝາຍສໍາຄັນຍຸດທະສາດຕໍ່ການຕໍ່ຕ້ານຂອງລາວໃນເມື່ອກ່ອນກໍ່ຄືຕໍ່ການປະຕິວັດລາວ ແລະ ການປະຕິວັດຂອງ 3 ປະເທດ ອິນດູຈີນ ໃນເວລາຕໍ່ມາ. ກໍາລັງຕໍ່ຕ້ານທີ່ ປະທານ ຄາໍໄຕ ສີພັນດອນ ໄດ້ອົບຮົມ ຝຶກຝົນຫຼໍ່ ຫຼອມກໍ່ສ້າງໂດຍຜ່ານການທົດສອບໃນຂະບວນການຕໍ່ຕ້ານຢູ່ເຂດໃຕ້ ແລະ ເຂດກາງລາວໄດ້ເປັນກໍາລັງສໍາຄັນໃນການຕໍ່ສູ້ປົກປັກຮັກສາສອງແຂວງເຕົ້າໂຮມ ແລະ ຕໍ່ມາຈໍານວນສ່ວນຫຼາຍໄດ້ກາຍເປັນພະນັກງານຫຼັກແຫຼ່ງ ແລະ ເປັນການນໍາຂອງພັກຂອງການປະຕິວັດລາວ. ເມື່ອມີການລວມລາວ 1957, ສູນກາງພັກເຫັນແຈ້ງກົນອຸບາຍຂອງສັດຕູທີ່ຫວັງທໍາລາຍການປອງດອງຊາດ ດັບສູນກາໍລັງປະຕິວັດ. ສະນັ້ນ, ພັກເຮົາຖືການລວມລາວ ເປັນພຽງຍຸດໂທບາຍເພື່ອປະຕິບັດຈຸດໝາຍຂະ ຫຍາຍກໍາລັງ ເທົ່ານັ້ນ. ໃນຂະນະດຽວກັນນັ້ນ, ຖືການເຄື່ອນໄຫວທາງລັບເພື່ອກໍ່ສ້າງຮາກຖານການເມືອງຂະຫຍາຍກໍາລັງປະ ຕິວັດ ໃນທົ່ວປະເທດເປັນວຽກງານຍຸດທະສາດ ແລະ ປະທານຄໍາໄຕ ສີພັນດອນໄດ້ເປັນຜູ້ຮັບຜິດຊອບຈັດຕັ້ງຊີ້ນໍາພາ ວຽກງານສໍາຄັນດັ່ງກ່າວ. ດ້ວຍການກໍ່ສ້າງຮາກຖານການ ເມືອງຢ່າງແໜ້ນໜາ ແລະ ກໍາລັງປະຕິວັດມີການຂະຫຍາຍຕົວຢ່າງກ້ວາງຂວາງໃນທົ່ວປະເທດ ໄດ້ເຮັດໃຫ້ສະພາບການຂອງການປະຕິວັດລາວທີ່ຄັບຂັນຫຼໍ່ແຫຼມ ເບິ່ງຄືວ່າຈະຫຼົ້ມຈົມໃນຊຸມປີ 1959-1960 ນັ້ນ ຜ່ານພົ້ນໄປໄດ້ ແລະ ເຮັດໃຫ້ການປະຕິບັດແຜນນະໂຍບາຍຫັນທິດຕໍ່ສູ້ຂອງພັກບັນລຸຜົນສໍາເລັດຢ່າງມີໄຊ, ການປະຕິວັດລາວສືບຕໍ່ຂະຫຍາຍຕົວຢ່າງແຂງແຮງທັງທ່າແຮງ ແລະ ກໍາລັງ. ເພື່ອສືບຕໍ່ການຕໍ່ສູ້ຕີເອົາຊະນະກົນອຸບາຍຮຸກຮານ ແລະ ຂອງຈັກກະພັດອາເມລິກາ ແລະ ລູກມື, ສູນກາງພັກເຫັນແຈ້ງເຖິງຄວາມສໍາຄັນຍຸດທະສາດຂອງການກໍ່ສ້າງປັບປຸງກໍາລັງປະຕິວັດໃນທຸກດ້ານ, ໃນນັ້ນຖືເປັນສໍາຄັນການ ເພີ່ມທະວີກໍາລັງປະກອບອາວຸດປະຕິວັດ. ຢືນຕໍ່ໜ້າຄວາມຮຽກຮ້ອງຕ້ອງການຂອງການປະຕິວັດ, ປະທານ ຄໍາໄຕ ໄດ້ຮັບມອບໝາຍໜ້າທີ່ໃຫ້ເປັນຜູ້ບັນຊາການສູງສຸດ ບັນດາກໍາລັງປະກອບອາວຸດ ຝ່າຍປະເທດລາວ ແລະ ຕໍ່ມາເປັນຜູ້ບັນຊາການສູງສຸດກອງທັບປົດປ່ອຍປະຊາຊົນລາວ. ໂດຍຮັບຮູ້ແຈ້ງເຖິງຄວາມສໍາຄັນຍຸດທະ ສາດຂອງໜ້າທີ່ ທີ່ໄດ້ຮັບມອບໝາຍ, ປະທານໄດ້ເຮັດສໍາເລັດໜ້າທີ່ດັ່ງກ່າວຢ່າງສົມກຽດ, ຊຶ່ງປະທານໄດ້ເອົາໃຈໃສ່ທະນຸບໍາລຸງ ຝຶກຝົນຫຼໍ່ຫຼອມ ແລະ ກໍ່ສ້າງເຮັດໃຫ້ກາໍລັງປະກອບອາວຸດປະຕິວັດ ທັງ 3 ປະເພດກໍາລັງ ນັບມື້ນັບເຕີບໃຫຍ່ເຂັ້ມແຂງ, ຈາກເບື້ອງຕົ້ນ ເປັນກອງໂຄສະນາປະກອບອາວຸດ ກ້າວຂຶ້ນເປັນກອງກໍາລັງປະກອບອາວຸດ ແລະ ເປັນກອງທັບປະຕິວັດທີ່ປະກອບດ້ວຍຫຼາຍເຫຼົ່າຮົບ ຊຶ່ງມີການປະກອບອາວຸດນັບມື້ນັບທັນສະໄໝ, ດ້ວຍສິນລະປະຍຸດ ຍຸດທະວິທີໃນການສູ້ຮົບທີ່ມີປະສິດທິຜົນ, ຊຶ່ງໄດ້ປະກອບສ່ວນຢ່າງສົມກຽດຮ່ວມກັບປະຊາຊົນລາວບັນດາເຜົ່າໃນທົ່ວປະເທດ ຕີເອົາຊະນະຈັກກະພັດອາເມລິກາ ແລະ ລູກມື, ສໍາເລັດການປະຕິວັດປົດປ່ອຍຊາດ, ກອບກູ້ເອກະລາດ, ອິດສະຫຼະພາບ ແລະ ຜືນແຜ່ນດິນອັນຄົບຖ້ວນມາໃຫ້ປະເທດຊາດ ແລະ ປະຊາຊົນເຮົາ.

      ພາຍຫຼັງປະເທດຊາດໄດ້ຮັບການປົດປ່ອຍຢ່າງສົມບູນ, ດ້ວຍຄວາມໄວ້ເນື້ອເຊື່ອໃຈຈາກພັກ, ຈາກກອງທັບ ແລະ ປະຊາຊົນເຮົາ, ປະທານ ສືບຕໍ່ເປັນກໍາມະການກົມການເມືອງສູນກາງພັກ, ໄດ້ຮັບແຕ່ງຕັ້ງເປັນຮອງນາຍົກລັດຖະມົນຕີ, ເປັນລັດຖະມົນ ຕີກະຊວງປ້ອງກັນປະເທດ ແລະ ສືບຕໍ່ເປັນຜູ້ບັນຊາການສູງສຸດກອງທັບປະຊາຊົນລາວ. ດ້ວຍຄວາມຮັບຜິດຊອບຢ່າງສູງຕໍ່ໜ້າທີ່ອັນສໍາຄັນດັ່ງກ່າວ, ປະທານໄດ້ເປັນເສນາທິການໃຫ້ສູນກາງພັກ ແລະ ລັດຖະບານ, ໄດ້ຄຽງບ່າຄຽງໄຫຼ່ກັບປະທານ ໄກ ສອນ ພົມວິຫານ ແລະ ກົມການເມືອງສູນກາງພັກໃນການຄົ້ນຄ້ວາ ກໍານົດທິດທາງໜ້າທີ່ຍຸດທະສາດ ຂອງການປະຕິວັດລາວ ໃນໄລຍະໃໝ່, ໂດຍປະທານ ຄາໍໄຕ ສີພັນດອນ ໄດ້ເປັນເຈົ້າການສະເໜີໃຫ້ ກົມການເມືອງສູນກາງພັກ ພິຈາລະນາຕົກລົງກ່ຽວ ກັບການກໍານົດສອງໜ້າທີ່ຍຸດທະສາດ ຂອງການປະຕິວັດໃນໄລຍະໃໝ່, ເຊິ່ງໃນນັ້ນຖືເອົາການປົກປັກຮັກສາປະເທດຊາດເປັນໜ້າທີ່ສໍາຄັນຢືນຢູ່ແຖວໜ້າຕໍ່ກັບໜ້າທີ່ສ້າງສາພັດທະນາປະເທດຊາດ. ນັ້ນເປັນການກໍານົດໜ້າທີ່ຍຸດທະສາດທີ່ຖືກ ຕ້ອງສອດຄ່ອງກັບສະພາບການຕົວຈິງຂອງລາວ. ດ້ວຍການປະຕິບັດສອງໜ້າທີ່ຍຸດທະສາດດັ່ງກ່າວ ຢ່າງໄດ້ຮັບຜົນດີໄດ້ເຮັດໃຫ້ ສາທາລະນະລັດ ປະຊາທິປະໄຕ ປະຊາຊົນລາວ ທີ່ໜຸ່ມນ້ອຍ ສາມາດຜ່ານຜ່າອຸປະສັກຕ່າງໆ ນາໆ ແລະ ນັບມື້ນັບກ້າວໄປໜ້າດ້ວຍບາດກ້າວທີ່ໜັກແໜ້ນ. ພ້ອມດຽວກັນນັ້ນ,  ກອງທັບປະຊາຊົນລາວກໍ່ໄດ້ຮັບການປັບປຸງເພີ່ມທະວີໃນທຸກດ້ານ ໂດຍສ້າງໃຫ້ເປັນກອງທັບທ່ີມີແບບແຜນ ແລະ ທັນສະໄໝເທື່ອລະກ້າວ. ດ້ວຍຄວາມເຊື່ອໝັ້ນໄວ້ວາງໃຈ ຂອງໝູ່ຄະນະ ກໍ່ຄືຂອງທົ່ວພັກ, ທົ່ວກອງທັບ ແລະ ທົ່ວ ປວງຊົນບັນດາເຜົ່າ, ປະທານໄດ້ເປັນຜູ້ນໍາສູງສຸດຂອງພັກ ແລະ ລັດ, ພວມຈັດຕັ້ງນໍາພາປະ ຊາຊົນລາວບັນດາເຜົ່າສືບຕໍ່ປະຕິບັດແນວທາງປ່ຽນແປງໃໝ່ຮອບດ້ານ ຢ່າງມີຫຼັກການທີ່ພັກ ແລະ ປະທານ ໄກສອນ ພົມ ວິຫານ ເປັນຜູ້ລິເລີ່ມ, ພາປະເທດຊາດ ແລະ ປະຊາຊົນເຮົາຜ່ານຜ່າທຸກອຸປະສັກຫຍຸ້ງຍາກ ເພື່ອກ້າວໄປສູ່ຈຸດໝາຍສັງຄົມນິ ຍົມເທື່ອລະກ້າວຢ່າງໜັກແໜ້ນ.

    ປະທານ ຄໍາໄຕ ສີພັນດອນ ແມ່ນນັກປະຕິວັດທີ່ມີການເຄື່ອນໄຫວອັນໂດດເດັ່ນຂອງພັກເຮົາ, ເຊິ່ງຕະຫຼອດ ໄລຍະຜ່ານມາເພິ່ນໄດ້ປະກອບສ່ວນຢ່າງໃຫຍ່ຫຼວງ, ມີລັກສະນະຮອບດ້ານເຂົ້າໃນການຈັດຕັ້ງນໍາພາ ພາລະກິດປະຕິວັດຂອງພັກ ແລະ ປະ ຊາຊົນເຮົາ.

      ບົດບາດຂອງປະທານ ຄໍາໄຕ ສີພັນດອນ, ກ່ອນອື່ນໝົດແມ່ນຕິດພັນກັບການກໍ່ສ້າງ ແລະ ຂະຫຍາຍກາໍລັງ ປະຕິວັດໃນໝູ່ປະຊາຊົນ. ນັບແຕ່ເລີ່ມຕົ້ນທໍາອິດ ຂອງການເຄື່ອນໄຫວປະຕິວັດຈົນຮອດປະຈຸບັນນີ້ ບໍ່ວ່າຈະຢູ່ໃນຖານະ ຕໍາແໜ່ງໃດກໍ່ຕາມເພິ່ນລ້ວນແຕ່ຖືປະຊາຊົນເປັນບໍ່ເກີດຂອງຂະບວນການ ແລະ ກໍາລັງແຮງຂອງການປະຕິວັດ ທັງມີຄວາມເຊື່ອໝັ້ນຢ່າງແນວແນ່ຕໍ່ກໍາລັງແຮງຂອງປະຊາຊົນ. ຍ້ອນແນວນັ້ນ, ເພີ່ນຖືສາໍຄັນ ແລະ ຢຶດໝັ້ນຢ່າງສະເໝີຕົ້ນສະເໝີປາຍໃນວຽກງານສຶກສາອົບຮົມ, ຂົນຂວາຍຈັດຕັ້ງນໍາພາປະຊາຊົນບັນດາເຜົ່າເພື່ອເສີມຂະຫຍາຍກາໍລັງແຮງແຫ່ງຄວາມສາມັກຄີຂອງປະຊາ ຊົນຮັບໃຊ້ການກໍ່ສ້າງ ແລະ ຂະຫຍາຍກາໍລັງປະຕິວັດ.

    ປະທານ ຄາໍໄຕ ສີພັນດອນ, ແມ່ນນັກຍຸດທະສາດ ທີ່ມີທັດສະນະວິໄສທາງການເມືອງ ແລະ ການທະຫານອັນ ກວ້າງໄກ ສາມາດຕີລາຄາ ແລະ ຄາດຄະເນການຜັນແປ ຂອງສະຖານະການ ເພື່ອເປັນເຈົ້າການໃນການແກ້ໄຂ. ເພິ່ນ ກາຍເປັນເພື່ອນຮ່ວມຮົບທີ່ໃກ້ຊິດ ແລະ ສະໜິດສະໜົມທີ່ສຸດຂອງປະທານ ໄກສອນ ພົມວິຫານ ແລະ ຄຽງບ່າຄຽງໄຫຼ່ກັບຜູ້ນໍາພັກ-ລັດຄົນອື່ນໆ ໃນການຄົ້ນຄວ້າກໍານົດແນວທາງ, ນະໂຍບາຍ, ແຜນນະໂຍບາຍຍຸດທະສາດ ແລະ ວິທີປະຕິວັດທີ່ຖືກຕ້ອງສອດຄ່ອງໃຫ້ແກ່ການປະຕິວັດລາວໃນແຕ່ລະໄລຍະ. ໃນການຕັດສິນໃຈ ແລະ ໃນການເຄື່ອນໄຫວຂອງເພິ່ນເວລາໃດກໍ່ຢຶດຫຼັກຄວາມຖືກຕ້ອງ, ເຄັ່ງຄັດໃນຄວາມຮັບຜິດຊອບ, ເຂັ້ມງວດດ້ານລະບຽບວິໄນເພື່ອທຸ້ມເທສະຕິປັນຍາເຂົ້າໃນການປະຕິບັດໜ້າທີ່ຂອງຕົນໃຫ້ດີທີ່ສຸດ. ປະທານ ຄໍາໄຕ ຍັງແມ່ນນັກຈັດຕັ້ງບັນຊາທີ່ມີຄວາມປີຊາສາມາດ, ຮູ້ເລີ່ມຕົ້ນວຽກງານທີ່ຖືກຕ້ອງ, ຮູ້ຈັດວາງກາໍລັງທີ່ເໝາະສົມ, ມີຄວາມກ້າແກ່ນ, ທຸ່ນທ່ຽງ, ເດັດດ່ຽວໜຽວ   ແໜ້ນໃນການຊີ້ນໍາບັນຊາ ແລະ ເປັນເຈົ້າການໃນທຸກກໍລະນີສະພາບການ, ຊຶ່ງໄດ້ຍາດເອົາໄຊຊະນະຢ່າງຕໍ່ເນື່ອງມາໃຫ້ການປະຕິວັດລາວ.

     ປະທານ ຄໍາໄຕ ສີພັນດອນ, ແມ່ນໜຶ່ງໃນບັນດາຜູ້ນໍາຂອງພັກເຮົາທີ່ກໍາຄັນທຸງແຫ່ງຄວາມສາມັກຄີ ເປັນເອກະ ພາບຢູ່ພາຍໃນພັກ ແລະ ໃນຖັນແຖວປະຕິວັດ, ທັງເປັນສັນຍາລັກແຫ່ງຄວາມສາມັກຄີອັນເປັນປຶກແຜ່ນຂອງທົ່ວປວງ ຊົນທັງຊາດ, ດ້ວຍການເຄົາລົບ ແລະ ປະຕິບັດຢ່າງເຂັ້ມງວດຕໍ່ບັນດາຫຼັກການແຫ່ງການຈັດຕັ້ງເຄື່ອນໄຫວຂອງພັກ ແລະ ດ້ວຍຈິດໃຈເອື້ອເຟື້ອເຜື່ອແຜ່ຕໍ່ໝູ່ສະຫາຍ ແລະ ຕໍ່ມະຫາຊົນ; ເດັດດ່ຽວຕ້ານທຸກປະກົດການທີ່ຝືນກັບຫຼັກການ ແລະ ລະບຽບວິໄນເພື່ອປົກ ປ້ອງຄວາມປອດໃສຂາວສະອາດຂອງການຈັດຕັ້ງ ແລະ ກໍ່ສ້າງເພື່ອນສະຫາຍໃຫ້ມີການປະພຶດປະຕິບັດທີ່ເປັນແບບຢ່າງ, ໄດ້ເຮັດໃຫ້ເພິ່ນໄດ້ຮັບຄວາມເຄົາລົບນັບຖື ແລະ ເຊື່ອໝັ້ນຈາກການຈັດຕັ້ງ ແລະ ເພື່ອນສະຫາຍຢູ່ອ້ອມຂ້າງຕະຫຼອດມາ.

      ປະທານ ຄໍາໄຕ ສີພັນດອນ, ເປັນຜູ້ໜຶ່ງທີ່ໄດ້ປະກອບສ່ວນຢ່າງຕັ້ງໜ້າເຂົ້າໃນການສ້າງ, ປັບປຸງ ແລະ ເພີ່ມທະວີຄວາມສາມັກຄີແບບພິເສດລະຫວ່າງລາວ-ຫວຽດນາມ ເວົ້າລວມ, ເວົ້າສະເພາະເພິ່ນໄດ້ກາຍເປັນສັນຍາລັກແຫ່ງ ການຮ່ວມສໍາພັນສູ້ຮົບແບບພິເສດລະຫວ່າງກອງທັບ ແລະ ປະຊາຊົນລາວກັບກອງທັບ ແລະ ປະຊາຊົນຫວຽດນາມຕະຫລອດມາ. ຄຸນງາມຄວາມດີທີ່ ປະທານ ຄຳໄຕ ສີພັນດອນ ໄດ້ອຸທິດຕົນໃຫ້ແກ່ປະເທດຊາດ ແລະ ປະຊາຊົນ ເວົ້າສະເພາະແມ່ນ 14 ປີ ທີ່ເປັນຜູ້ນໍາສູງສຸດຂອງປະເທດ ໄດ້ຊີ້ນໍາ-ນຳພາ ໂດຍກົງ ຫຼື ໄດ້ປະກອບສ່ວນຮ່ວມກັບໝູ່ຄະນະນຳພາ ແລະ ຊີ້ນຳ-ບັນຊາ. ບັນດາເຫດການ ແລະ ຂໍ້ມູນປະຫວັດສາດທີ່ຍົກຂຶ້ນ ລ້ວນແຕ່ໄດ້ຢັ້ງຢືນ ແລະ ສະທ້ອນໃຫ້ເຫັນຄຸນທາດການເມືອງ ກໍຄື ມານະຈິດປະຕິວັດ ແລະ ຄວາມເປັນເຈົ້າການປະດິດສ້າງຂອງ ປະທານ ຄຳໄຕ ສີພັນດອນ ເຊິ່ງຖອດມາເປັນບົດຮຽນເພື່ອສຶກສາຄົ້ນຄວ້າ ເປັນຕົ້ນແມ່ນ:

① ການມີຄວາມຕື່ນຕົວຮັກຊາດຕັ້ງແຕ່ຍັງໜຸ່ມ ແລະ ການຕັດສິນໃຈເຂົ້າຮ່ວມການປະຕິວັດ ບົນພື້ນຖານການກຳແໜ້ນສະພາບການຜັນແປທີ່ເກີດຂຶ້ນ ຢູ່ໃນພາກພື້ນ ແລະ ໃນໂລກ ກໍຄື ທ່າຂະຫຍາຍຕົວແຫ່ງການຕໍ່ສູ້ຂອງກຳລັງທີ່ຮັກຊາດກ້າວໜ້າ ແລະ ເປັນທຳຢູ່ພາຍໃນປະເທດ; ການມີຄວາມເຊື່ອໝັ້ນອັນເລິກເຊິ່ງຕໍ່ປະຊາຊົນ, ມີທັດສະນະມະຫາຊົນອັນກວ້າງຂວາງ ແລະ ເວລາໃດກໍເຄື່ອນໄຫວຕິດແທດກັບຮາກຖານປະຊາຊົນ, ອີງໃສ່ກຳລັງມະຫາຊົນ ໃນການຕໍ່ສູ້ເພື່ອໄຊຊະນະ; ການອຸທິດຕົນຢ່າງບໍ່ມີຂອບເຂດ ເພື່ອປະເທດຊາດ-ເພື່ອປະຊາຊົນ, ເພື່ອຈັດຕັ້ງປະຕິບັດແນວທາງ ແລະ ອຸດົມການຂອງພັກ ໃຫ້ເປັນຈິງ.

② ຄວາມເປັນເຈົ້າການລິເລີ່ມ ແລະ ຄວາມກ້າຫານເຂົ້າໄປກໍ່ສ້າງຮາກຖານການເມືອງ ແລະ ສ້າງຖານທີ່ໝັ້ນປະຕິວັດ ຢູ່ເຂດແນວຫຼັງຂອງສັດຕູ; ຄວາມຊຳນິຊຳນານໃນການເຄື່ອນໄຫວປິດລັບ ແລະ ຄວາມມີໄຫວພິບໃນການຊີ້ນຳ-ບັນຊາຕົວຈິງເປັນຕົ້ນແມ່ນ “ການບັນຊາສາມຂາ” ໃນສະໄໝຕໍ່ຕ້ານ (ບັນຊາການຈັດຕັ້ງແນວລາວອິດສະຫຼະ, ບັນຊາກອງທະຫານ ແລະ ບັນຊາອົງການປົກຄອງ. ຂຽນຫຍໍ້ວ່າ: ບສຂ).

③ ການລົງເລິກກໍາແໜ້ນສະພາບການ ທັງມີຄວາມສະດຸ້ງໄວ, ເຫັນກວ້າງມອງໄກ ແລະ ຄ່ອງແຄ້ວ ວ່ອງໄວ ໃນການແກ້ໄຂບັນຫາສະເພາະໜ້າ ເພື່ອບັນລຸເປົ້າໝາຍຍຸດທະສາດ, ຊຶ່ງສະແດງອອກໃນການນຳເອົາກຳລັງຂອງຝ່າຍປະເທດລາວ ເຂົ້າມານະຄອນຫຼວງວຽງຈັນ (ນະຄອນເປັນກາງ). ການປຸກລະດົມຂະບວນການຕໍ່ສູ້ທາງການເມືອງຂອງປະຊາຊົນ ແລະ ການຂົນຂວາຍຊຸກຍຸ້ໃຫ້ເກີດການຜັນແຍກຢູ່ພາຍໃນກຳລັງຂອງຝ່າຍກົງກັນຂ້າມ ຕິດພັນກັບການນຳໃຊ້ກຳລັງທະຫານກົດໜີບ ເພື່ອສ້າງທ່າໄດ້ປຽບໃຫ້ແກ່ກຳລັງຝ່າຍປະເທດລາວຕະຫຼອດຮອດການປົດອາວຸດກຳລັງຝ່າຍກົງຂ້າມ ດ້ວຍໄຫວພິບອັນຄົມແຫຼມແນບນຽນ ຊຶ່ງໄດ້ສ້າງເງື່ອນໄຂອຳນວຍໃຫ້ແກ່ການການຢຶດອຳນາດໂດຍບໍ່ເສຍເລືອດເນື້ອ...

④ ການມີບົດບາດອັນສໍາຄັນ ແລະ ມີຄວາມສາມາດໃນການຊີ້ນໍາ-ບັນຊາການຈັດຕັ້ງປະຕິບັດ 2 ໜ້າທີ່ຍຸດທະສາດ ໂດຍສະເພາະແມ່ນ: ການປົກປັກຮັກສາລະບອບໃໝ່ ຈາກການມ້າງເພທຳລາຍ ແລະ ການກໍກະບົດໂຄ່ນລົ້ມລວມທັງການຕອບຕ້ານຢ່າງມີໄຊ ຕໍ່ການຮຸກຮານ ແລະ ບຽດຢຶດເອົາດິນແດນໂດຍອິດທິກຳລັງປໍລະປັກ.

⑤ ການປະກອບສ່ວນຢ່າງເປັນເຈົ້າການຮ່ວມກັບ ປະທານ ໄກສອນ ພົມວິຫານ ໃນການນໍາພາລິເລີ່ມການປ່ຽນແປງໃໝ່; ການມີຄວາມກ້າຫານເປັນເຈົ້າການ ແລະ ການມີວິໄສທັດອັນກວ້າງໄກ ໃນການລິເລີ່ມສ້າງແຜນຍຸດທະສາດ ຮອດປີ 2020 ແລະ ຟື້ນຟູແຜນພັດທະນາເສດຖະກິດ-ສັງຄົມ 5 ປີ ເພື່ອກໍານົດທິດ ແລະ ປະສົມປະສານແຜນການກັບຕະຫຼາດ.

⑥ ການສະຫຼູບຖອດຖອນບົດຮຽນ 10 ປີ ປ່ຽນແປງໃໝ່ ແລະ ການປັບປຸງບູລະນະແນວທາງໃຫ້ມີຄວາມສົມບູນຍິ່ງຂຶ້ນ; ລວມທັງການຊີ້ນຳໃຫ້ອອກມະຕິຂອງສູນກາງ ແລະ ຂອງກົມການເມືອງ ເພື່ອຜັນຂະຫຍາຍແນວທາງ ໃຫ້ເປັນອັນລະອຽດ ແລະ ບັນລຸຜົນເປັນຈິງ ຊຶ່ງໃນນັ້ນລວມມີມະຕິກ່ຽວກັບການກໍ່ສ້າງຮາກຖານການເມືອງ ແລະ ພັດທະນາຊົນນະບົດຮອບດ້ານ; ກ່ຽວກັບການພັດທະນາຊັບພະຍາກອນມະນຸດ; ກ່ຽວກັບວັດທະນະທຳໃນໄລຍະໃໝ່, ກ່ຽວກັບການຫັນເປັນອຸດສາຫະກຳ ແລະ ຫັນເປັນທັນສະໄໝ ແລະ ອື່ນໆ.

⑦ ການສະເໜີອອກພັກຜ່ອນ ດ້ວຍຄວາມເປັນເຈົ້າການ ເພື່ອຮັບປະກັນການສືບທອດອັນໜັກແໜ້ນ ແລະ ສ້າງພັກໃຫ້ເຕີບໃຫຍ່ເຂັ້ມແຂງ; ການສືບຕໍ່ອຸທິດຕົນ ເພື່ອຈັດຕັ້ງປະຕິບັດແນວທາງຂອງພັກໃຫ້ເປັນຈິງ.

ສັງລວມແລ້ວ, ສິ່ງລວມຍອດທີ່ສຸດຂອງປະທານ ຄໍາໄຕ ສີພັນດອນ ແມ່ນຄວາມຈົງຮັກພັກດີ, ບໍລິສຸດພຸດຜ່ອງຕໍ່ພັກຕໍ່ປະເທດ ຊາດ, ເວລາໃດກໍ່ຖືຜົນປະໂຫຍດຂອງພັກ ຂອງຊາດເໜືອກ່ວາສິ່ງອື່ນໃດ. ແມ່ນນໍ້າໃຈຮັກຊາດ ຄຽດແຄ້ນຜູ້ຮຸກຮານ, ຈິດໃຈຮັກເຊື້ອແພງຊາດ, ຄວາມມະນຸດສະທໍາ, ຄວາມມານະອົດທົນ ແລະ ສູ້ຊົນເພື່ອອຸທິດຕົນໃຫ້ພາລະກິດປະຕິວັດ, ທຸ່ນທ່ຽງເຊື່ອໝັ້ນ, ເອົາການເອົາງານ ແລະ ໄຫວພິບໃນການຈັດຕັ້ງປະຕິບັດວຽກງານທີ່ຕົນຮັບຜິດຊອບ, ດໍາລົງຊີວິດທີ່ປອດໃສຂາວສະ ອາດ, ກະທັດລັດປະຍັດມັດຖະຍັດ, ໃກ້ຊິດມະຫາຊົນ, ຈິງໃຈຕໍ່ເພື່ອນສະຫາຍ, ເອື້ອເຟື້ອກັບທຸກຄົນ ຢູ່ອ້ອມຂ້າງຕົນ; ເຂັ້ມງວດໃນດ້ານຫຼັກການ, ເຄັ່ງຄັດຕໍ່ລະບຽບວິໄນ, ປະຊາທິປະໄຕໃນໝູ່ຄະນະ...ທີ່ກ່າວມານັ້ນ ມັນປະກອບເຂົ້າບຸກຄະລິກະພາບຂອງປະທານ ຄາໍໄຕ ສີພັນດອນ, ຊຶ່ງເປັນປັດໃຈພື້ນຖານຄໍ້າປະກັນຜົນສໍາເລັດໃນພາລະກິດຊີ້ນໍາ ບັນຊາ ແລະ ນໍາພາຂອງເພິ່ນ, ເຮັດໃຫ້ເພິ່ນກາຍເປັນຄັນທຸງແຫ່ງຄວາມສາມັກຄີ ກໍ່ຄືຄວາມ ເຊື່ອໝັ້ນໄວ້ວາງໃຈ ແລະ ການເຄົາລົບນັບຖືຂອງມະຫາຊົນທົ່ວໄປ.

      ທັງໝົດນັ້ນ ເປັນສ່ວນໜຶ່ງທີ່ສາໍຄັນແຫ່ງຜົນງານການປະກອບສ່ວນອັນໃຫຍ່ຫຼວງຂອງ ປະທານ ຄາໍໄຕ ສີພັນດອນ ທີ່ໄດ້ອຸທິດຕົນເພື່ອຊາດ, ເພື່ອປະຊາຊົນ ແລະ ພວມສືບຕໍ່ອຸທິດແກ່ພາລະກິດປະຕິວັດຂອງພັກ ຂອງປະຊາຊົນລາວເຮົາ. ພວກເຮົາທີ່ເປັນພະນັກງານ-ສະມາຊິກພັກ ຕະຫຼອດຮອດຊາວໜຸ່ມ, ເຍົາວະຊົນ ແລະ ປະຊາຊົນ ບັນດາຊັ້ນຄົນຕ່າງໆ ໃນສັງຄົມ ຮໍ່າຮຽນເອົາແບບຢ່າງການເຄື່ອນໄຫວ ແລະ ການອຸທິດຕົນຂອງ ປະທານ ຄຳໄຕ ສີພັນດອນ ເພື່ອຄວາມເປັນເອກະລາດ, ຄວາມມັ່ງຄັ້ງເຂັ້ມແຂງ ແລະ ຄວາມຈະເລີນວັດທະນາຂອງປະເທດ, ເພື່ອຄວາມຢູ່ດີກິນດີ ແລະ ຄວາມຮັ່ງມີຜາສຸກຂອງປະຊາຊົນລາວບັນດາເຜົ່າ ເປັນເນື້ອໃນສຳຄັນໃນການເຮັດວຽກງານສຶກສາອົບຮົມຄົນຮຸ່ນສືບທອດໃນຕໍ່ໄປ.

ຄະນະໂຄສະນາອົບຮົມແຂວງບໍລິຄໍາໄຊ ເຂົ້າຮ່ວມກອງປະຊຸມສ່ອງແສງລາຍງານວຽກງານໂຄສະນາຜ່ານສື່ ( ເວັບໄຊສ ) ປະຈໍາໄຕມາດ II

ລາຍລະອຽດ

ສ້າງຂື້ນເມື່ອ ວັນຈັນ, 31 ກໍລະກົດ 2023 08:31

ຂຽນໂດຍ ນາງ ນິກອນ ໄມຂະມຸວົງ

       ໃນຕອນເຊົ້າຂອງວັນທີ 26 ກໍລະກົດ 2023 ຄະນະໂຄສະນາອົບຮົມອົບຮົມສູນກາງພັກ ໄດ້ຈັດກອງປະຊຸມສ່ອງແສງລາຍ ງານວຽກງານໂຄສະນາຜ່ານສື່ ( ເວັບໄຊສ ) ປະຈໍາໄຕມາດ II (4-5-6) 2023 ແລະ ທິດທາງແຜນການ ເຄື່ອນໄຫວວຽກງານ ເວັບໄຊສ ໃນໄຕມາດ III (7-8-9) 2023 ໂດຍຜ່ານກອງປະຊຸມທາງໄກ. ພາຍໃຕ້ການເປັນປະທານໃນກອງປະຊຸມຄັ້ງນີ້ ໂດຍ ທ່ານ ນາງ ວິລະວອນ ພັນທະວົງ ຄະນະປະຈໍາພັກ ຮອງຫົວໜ້າຄະນະໂຄສະນາອົບຮົມສູນກາງພັກ ຜູ້ຊີ້ນໍາວຽກງານກົມຂໍ້ມູນ ຂ່າວສານ ແລະ ຝຶກອົບຮົມ; ຄະນະໂຄສະນາອົບຮົມແຂວງບໍລິຄໍາໄຊ ນໍາໂດຍ ທ່ານ ຄໍາໃສ ຄໍາພູບານ ຮອງຫົວໜ້າຄະນະໂຄ ສະນາອົບຮົມແຂວງ ພ້ອມດ້ວຍຄະນະຮັບຜິດຊອບວຽກງານເວັບໄຊສ ເຂົ້າຮ່ວມທັງໝົດ 05 ສະຫາຍ, ຍິງ 02 ຫາຍ; ມີຮອງ ຫົວໜ້າຄະນະໂຄສະນາ ອົບຮົມບັນດາແຂວງ ແລະ ພະນັກງານຜູ້ຮັບຜິດຊອບເວັບໄຊສ ເຂົ້າຮ່ວມຢ່າງພ້ອມພຽງ.

   - ກອງປະຊຸມຍັງໄດ້ຮັບຟັງການສ່ອງແສງລາຍງານວຽກງານໂຄສະນາຜ່ານສື່ ( ເວັບໄຊສ )ຈາກຜູ້ແທນເຂົ້າຮ່ວມກອງປະຊຸມ.

         ໃນຕອນທ້າຍຂອງກອງປະຊຸມ ທ່ານ ນາງ ວິລະວອນ ພັນທະວົງ ຄະນະປະຈໍາພັກ ຮອງຫົວໜ້າຄະນະໂຄສະ ນາອົບຮົມ ສູນກາງພັກ ຜູ້ຊີ້ນໍາວຽກງານ ກົມຂໍ້ມູນຂ່າວສານ ແລະ ຝຶກອົບຮົມ ໄດ້ມີຄໍາເຫັນໂອ້ລົມ ເຊິ່ງກ່ອນອື່ນທ່ານໄດ້ຍ້ອງຍໍຊົມ ເຊີຍຕໍ່ຜົນງານການເຄື່ອນໄຫວວຽກງານໂຄສະນາຜ່ານສື່ (ເວັບໄຊ ) ຂອງຄະນະໂຄສະນາອົບຮົມແຂວງໃນໄລຍະຜ່ານມາ ແລະ ເພື່ອແນ່ໃສ່ຍົກສູງວຽກງານໂຄສະນາອົບຮົມພວກເຮົາໃຫ້ກ້າວສູ່ຄວາມທັນສະໄໝ,ສ້າງໃຫ້ຄະນະໂຄສະນາອົບຮົມບັນດາ ແຂວງ ມີຄວາມເຂັ້ມແຂງ ແລະ ມີເຄື່ອງມືໃນການໂຄສະນາເຜີຍແຜ່ແນວທາງນະໂຍບາຍ, ມະຕິ, ຄໍາສັ່ງ ຂອງພັກ-ລັດ ລວມເຖີງການ ເຄື່ອນໄຫວຂອງ ຄະນະນໍາຂອງແຂວງ; ພ້ອມນັ້ນ ທ່ານ ຍັງໄດ້ເນັ້ນໜັກບາງບັນຫາເຊັ່ນ:

1. ຄະນະໂຄສະນາອົບຮົມແຂວງຕ້ອງເປັນເຈົ້າການເລືອກເຟັ້ນພະນັກງານຜູ້ທີີ່ມີພອນສະຫວັນ, ມີຄວາມຮູ້, ຄວາມສາມາດ ມາຮັບຜິດຊອບວຽກງານດັ່ງກ່າວ ຜູ້ທີ່ຖືກແຕ່ງຕັ້ງຈະເປັນຜູ້ເກົ່າ ຫຼື ຜູ້ໃຫມ່ ຕ້ອງໄດ້ເອົາໃຈໃສ່ຍາດແຍ່ງຄວາມຮູ້ນໍາຜູ້ຮັບຜິດ ຊອບທາງສູນກາງເພືີ່ອພັດທະນາວຽກງານໃຫ້ສໍາເລັດໄດ້ຮັບໝາກຜົນທີ່ດີຕໍ່ ກັບບັນຫານີ້ຢາກໃຫ້ເອົາໃຈໃສ່ຢ່າງເລິກເຊິ່ງ.

2. ຕິດຕາມກວດກາຄືນການເຄືີ່ອນໄຫວເທິງຫນ້າກະດານຂ່າວເອເລັກໂຕຣນິກ(ເວັບໄຊ)ຂອງແຂວງຕົນໃນບັນດາເມນູ, ຄໍລໍາ ຕ່າງໆ ມີບົດຂ່າວ ບົດຄວາມ ຫຼື ຂໍ້ມູນຕ່າງໆ ມີການເຜີຍແຜ່ເປັນປົກກະຕິບໍ່ຢາກໃຫ້ຜູ້ຊີ້ນໍາວຽກງານເວັບໄຊ ຂອງຄະນະ ໂຄສະນາອົບຮົມແຂວງຕິດຕາມກວດກາຄືນ.

3. ພະຍາຍາມສ້າງການພົວພັນ ລະຫວ່າງຄະນະໂຄສະນາອົບຮົມແຂວງ ແລະ ຄະນະໂຄສະນາອົບຮົມເມືອງ ສ້າງການຫັນປ່ຽນ ໃຫ້ເມືອງມີການປະສານຂໍ້ມູນບົດຂ່າວການເຄື່ອນໄຫວຂອງເມືອງ ລົງໃນເວັບໄຊ ທັງເປັນການ ກໍ່ສ້າງພະນັກງານໃນ ຂັ້ນເມືອງ ໄດ້ຮຽນຮູ້ ແລະ ພ້ອມກັນຫັນເປັນທັນສະໄຫມໃນວຽກງານໂຄສະນາອົບຮົມ, ຄະນະໂຄສະນາອົບຮົມແຂວງຕ້ອງເປັນເຈົ້າການ ຊ່ວຍຄະນະໂຄສະນາອົບຮົມເມືອງໃນການເຄື່ອນໄຫວວຽກງານເວັບໄຊ.

4. ສ້າງກົນໄກການປະສານລະຫວ່າງຜູ້ຮັບຜິດຊອບເວັບໄຊຄະນະໂຄສະນາອົບຮົມແຂວງ ແລະ ທີມງານທາງ ສູນກາງ, ແຂວງ ໃດທີີ່ມີຂໍ້ຄົງຄ້າງກໍໃຫ້ຮີບຮ້ອນສະເຫນີຊ່ວຍກັນ, ທາງສູນກາງມີຄວາມພ້ອມທີີ່ຈະຊ່ວຍແກ້ໄຂໃນຂໍ້ຄົງຄ້າງຂອງ ແຕ່ລະ ແຂວງ.