ຊຸດອົບຮົມວຽກງານການເມືອງ-ແນວຄິດໃຫ້ນັກທຸລະກິດທົ່ວແຂວງບໍລິຄໍາໄຊ ປີ 2019

ຕອນເຊົ້າຂອງວັນທີ 7 ພຶດສະພາ 2019 ຄະນະໂຄສະນາອົບຮົມແຂວງບໍລິຄໍາໄຊ ໄດ້ເປີດຊຸດອົບຮົມການເມືອງ-ແນວຄິດໃຫ້ນັກທຸລະກິດທົ່ວແຂວງ ປີ 2019 ຢູ່ຫ້ອງປະຊຸມຫ້ອງວ່າການປົກຄອງແຂວງ ໂດຍການເປັນປະທານຂອງ ທ່ານ ບຸນມາ ບຸຈະເລີນ ຮອງເລຂາພັກແຂວງ ຮອງເຈົ້າແຂວງບໍລິຄຳໄຊ, ມີບັນດານັກທຸລະກິດໃນທົ່ວແຂວງ ພ້ອມດ້ວຍຄະນະຮັບຜິດຊອບ ເຂົ້າຮ່ວມ.

ໃນຊຸດອົບຮົມຄັ້ງນີ້ ໄດ້ເຜີຍແຜ່-ເຊື່ອມຊຶມເອກະສານທີ່ສໍາຄັນ 04 ບົດຄື : ບົດທີ 01 ຊາດລາວ ຄົນລາວໃນຄອບຄົວໃຫ່ຍແຫ່ງຊາດ, ບົດທີ 02 ແນວທາງນະໂຍບາຍເສດຖະກິດຂອງພັກ ແຜນພັດທະນາເສດຖະກິດ-ສັງຄົມຂອງລັດ, ບົດທີ 03 ຖານະບົດບາດຂອງນັກທຸລະກິດລາວ, ບົດທີ 04 ຈັນຍາທຳ ແລະ ຄວາມຮັບຜິດຊອບຂອງນັກທຸລະກິດ ພ້ອມນີ້ ຍັງໄດ້ຄົ້ນຄວ້າປະກອບຄໍາຄິດຄຳເຫັນ ແລກປ່ຽນບົດຮຽນຮ່ວມກັນຂອງນັກສໍາມະນາກອນ.

ຈຸດປະສົງຂອງການຝຶກອົບຮົມຄັ້ງນີ້ ເພື່ອຈັດຕັ້ງຜັນຂະຫຍາຍເນື້ອໃນຈິດໃຈມະຕິກອງປະຊຸມໃຫ່ຍ ຄັ້ງທີ X ຂອງພັກ ແລະ ມະຕິ VI ຂອງອົງຄະນະພັກແຂວງ ເຂົ້າສູ່ຊີວິດຕົວຈິງ ແລະ ສຶກສາອົບຮົມໃຫ້ເປົ້າໝາຍຕ່າງໆເວົ້າລວມ, ເວົ້າສະເພາະແມ່ນສຶກສາອົບຮົມນັກທຸລະກິດລາວໃຫ້ຮັບຮູ້, ເຂົ້າໃຈກ່ຽວກັບແນວທາງ-ນະໂຍບາຍຂອງພັກ ແລະ ລະບຽບກົດໝາຍຂອງລັດ, ເພື່ອຍົກສູງຈັນຍາທຳ, ເຊີດຊູຄວາມຮັກຊາດ ແລະ ຄວາມຮັບຜິດຊອບຂອງນັກທຸລະກິດຂຶ້ນອີກກ້າວໜຶ່ງ, ເພື່ອປະກອບສ່ວນໃຫ້ແກ່ການພັດທະນາເສດທະກິດ ແລະ ປົກປັກຮັກສາຄວາມສະຫງົບ, ຄວາມເປັນລະບຽບຂອງສັງຄົມລາວໃນຕໍ່ໜ້າ ແລະ ເພື່ອຍົກສູງຖານະບົດບາດອັນຕັ້ງໜ້າຂອງນັກທຸລະກິດພາຍໃນ ແຂວງບໍລິຄໍາໄຊ ໃຫ້ສູງເດັ່ນຂຶ້ນຢູ່ໃນສັງຄົມກໍຄືໃນເວທີສາກົນ.

ຊຸດຝຶກອົບຮົມດັ່ງກ່າວໄດ້ດໍາເນີນໄປເປັນ ເວລາ 01 ວັນເຕັມ ແລະ ອັດລົງດ້ວຍຜົນສໍາເລັດອັນດີງາມ.