ໃນວັນທີ 13 ພະຈິກ 2024 ຄະນະໂຄສະນາອົບຮົມແຂວງ ສົມທົບກັບຄະນະໂຄສະນາອົບຮົມເມືອງປາກກະດິງ ໄດ້ຈັດຊຸດອົບຮົມການເມືອງ-ແນວຄິດ ໃຫ້ປະຊາຊົນບັນດາເຜົ່າຢູ່ລຽບຕາມຊາຍແດນ ຂຶ້ນຢູ່ທີ່ບ້ານທົ່ງນ້ອຍ ເມືອງປາກກະດິງ ແຂວງບໍລິຄໍາໄຊ, ມີເລຂາພັກບ້ານ, ຮອງເລຂາໜ່ວຍພັກ, ສະມາຊິກພັກ, ພະນັກງານ, ທະຫານ, ຕຳຫຼວດ ທີ່ປະຈຳຢູ່ບ້ານລຽບຕາມຊາຍແດນ ແລະ ປະຊາຊົນ ຜູ້ເປັນຫົວໜ້າຄອບຄົວຂອງບ້ານ ເຂົ້າຮ່ວມ.
ຊຸດຝຶກອົບຮົມຄັ້ງນີ້ ໄດ້ຮັບຟັງການເຜີຍແຜ່-ເຊື່ອມຊຶມເອກະສານ ທີ່ສໍາຄັນຄື: ຊາດລາວ, ຄົນລາວ ແລະ ມູນເຊື້ອອັນສະຫງ່າລາສີຂອງປະຊາ ຊົນລາວ; ແນວທາງປ້ອງກັນຊາດ-ປ້ອງກັນຄວາມສະຫງົບທົ່ວປວງຊົນຮອບດ້ານ ແລະ ເອກະສານອົບຮົມປະຊາຊົນຢູ່ລຽບຕາມຊາຍແດນ.
ຊຸດອົບຮົມໃນຄັ້ງນີ້ ເຮັດໃຫ້ປະຊາຊົນບັນດາເຜົ່າຢູ່ຮາກຖານບ້ານ ແລະ ປະຊາຊົນຢູ່ລຽບຕາມຊາຍແດນ ໄດ້ຮັບຮູ້-ເຂົ້າໃຈ, ເຊື່ອມຊຶມແນວທາງ-ນະໂຍບາຍຂອງພັກ ແລະ ກົດໝາຍຂອງລັດໃຫ້ເລິກເຊິ່ງ;ເພື່ອເຊີດຊູຄວາມຮັກຊາດ, ຄວາມເປັນເອກະລາດ, ຄວາມເປັນເຈົ້າຕົນເອງ, ປົກປັກຮັກສາຊັບພະຍາກອນທຳມະຊາດ, ປົກປັກຮັກສາຮີດຄອງປະເພນີອັນດີງາມຂອງຊາດ, ປະກອບສ່ວນເຂົ້າໃນການສ້າງສາພັດທະນາບ້ານ-ເມືອງກໍ່ຄືປະເທດຊາດ, ຮັກສາຄວາມສະຫງົບ ແລະ ຄວາມເປັນລະບຽບຮຽບຮ້ອຍຂອງສັງຄົມໃຫ້ດີຂຶ້ນ; ເພື່ອຍົກສູງສະຕິລະວັງຕົວ ພ້ອມທັງເປັນເຈົ້າ ການຕອບຕ້ານກົນອຸບາຍຫັນປ່ຽນໂດຍສັນຕິຂອງສັດຕູ ແລະ ກຸ່ມຄົນບໍ່ດີຢ່າງທັນການເຮັດໃຫ້ເຂດຊາຍແດນກາຍເປັນແຫ່ງສັນຕິພາບ, ມິດ ຕະພາບ ແລະ ການຮ່ວມມືກັນເພື່ອພັດທະນາ.
