ໜ່ວຍພັກຮາກຖານຄະນະໂຄສະນາອົບຮົມແຂວງ ໄດ້ຈັດພິທີຮັບມະຫາຊົນກ້າວໜ້າ ຄື ສະຫາຍ ຈອມສີ ສູນດາວົງ ເຂົ້າເປັນສະມາຊິກພັກສໍາຮອງ ເຊິ່ງ ພິທີໄດ້ຈັດຂຶ້ນໃນຕອນເຊົ້າຂອງວັນທີ 31 ພຶດສະພາ 2024, ພາຍໃຕ້ເປັນປະທານຂອງ ສະຫາຍ ຄໍາໃສ ຄໍາພູບານ ຮອງເລຂາໜ່ວຍພັກຮາກຖານຄະນະໂຄສະນາອົບຮົມແຂວງ, ມີຕາງໜ້າຄະນະພັກຮາກຖານ, ໜ່ວຍພັກຮາກຖານຂົງ ເຂດການເມືອງ, ຄະນະໜ່ວຍພັກ ແລະ ສະມາ ຊິກພັກພາຍໃນຄະນະໂຄສະນາອົບຮົມແຂວງ ເຂົ້າຮ່ວມທັງໝົດ 13 ສະຫາຍ, ຍິງ 09 ສະຫາຍ. ພາຍຫຼັງ ຜ່ານມະຕິຕົກລົງ ສະບັບເລກທີ 116/ຄປພຂ ລົງວັນທີ 14 ພຶດສະພາ 2024 ສະຫາຍ ຄໍາໃສ ຄໍາພູບານ ປະທານພິທີການ ຕາງໜ້າຄະນະພັກຂັ້ນເທິງ ກໍໄດ້ກ່າວຮັບມະຫາຊົນເຂົ້າພັກສໍາຮອງຢ່າງເປັນທາງການ, ພ້ອມທັງໄດ້ໂອ້ລົມຕໍ່ພິທີ, ໂດຍຍົກໃຫ້ເຫັນເຖິງຄວາມສໍາຄັນໃນການເຂົ້າເປັນສະມາຊິກພັກ, ການປະຕິບັດລະບຽບພັກ ໂດຍສະເພາະ 11 ຂໍ້ຫ້າມ ທີ່ຄວນປະຕິບັດຢ່າງເຂັ້ມງວດ, ພ້ອມນັ້ນ ຍັງເນັ້ນໜັກໃຫ້ສະມາຊິກສໍາຮອງເອົາໃຈໃສ່ຝຶກຝົນຫຼໍ່ຫຼອມຕົນເອງໃຫ້ກາຍ ເປັນສະມາຊິກພັກສົມບູນທີ່ດີເດັ່ນອີກດ້ວຍ.
