ໃນຕອນເຊົ້າຂອງວັນທີ 19 ກໍລະກົດ 2024 ຄະນະໂຄສະນາອົບຮົມແຂວງ ສົມທົບກັບຫ້ອງວ່າການແຂວງ ຈັດກອງປະຊຸມ ເຊື່ອມຊຶມ ແລະ ຜັນຂະຫຍາຍ ມະຕິ ຂອງກົມການເມືອງສູນກາງພັກ ສະບັບເລກທີ 04/ກມສພ, ລົງວັນທີ 11 ເມສາ 2024 ວ່າດ້ວຍການສ້າງເສດຖະກິດ ເອກະລາດ ເປັນເຈົ້າຕົນເອງ ໃນໄລຍໃໝ່ ຢູ່ສະໂມສອນໃຫຍ່ຂອງແຂວງ ພາຍໃຕ້ການເປັນປະທານ ແລະ ບັນຍາຍເອກສານ ຂອງສະຫາຍ ສອນທະນູ ທຳມະວົງ ກຳມະການສູນກາງພັກ ເລຂາພັກແຂວງ-ເຈົ້າແຂວງບໍລິຄຳໄຊ, ມີຄະນະບໍລິຫານງານພັກແຂວງ, ຄະນະເລຂາທິການສະພາປະຊາຊົນແຂວງ, ຄະນະພັກ ກອງບັນຊາການ ປກຊ-ປກສ ແຂວງ, ຫົວໜ້າພະແນກການ, ອົງການທຽບເທົ່າ, ຫົວໜ້າຂະແໜງ, ບໍລິສັດ, ລັດວິສາຫະກິດ ອ້ອມຂ້າງແຂວງເຂົ້າຮ່ວມ 164 ທ່ານ, ຍິງ 42 ທ່ານ.
ເພື່ອເຮັດໃຫ້ຄະນະພັກແຕ່ລະຂັ້ນ, ສະມາຊິກພັກ, ພະນັກງານ-ລັດຖະກອນ ແລະ ປະຊາຊົນຊັ້ນຄົນຕ່າງໆຮັບຮູ້ເຂົ້າໃຈ ກ່ຽວກັບ ການສ້າງເສດ ຖະກິດ ເອກະລາດ ເປັນເຈົ້າຕົນເອງ ແລະ ຄວາມເປັນເຈົ້າການໃນການປະຕິບັດພັນທະ, ໜ້າທີ ຂອງແຕ່ລະພາກສ່ວນຢ່າງທົ່ວເຖິງ, ເພື່ອເປັນການສ້າງບາດກ້າວບຸກທະລຸໃນການພັດທະນາ, ຮັບປະກັນໃຫ້ແກ່ການຈະເລິນເຕີບໂຕທາງດ້ານເສດຖະກິດດ້ວຍຈັງຫວະທີ່ໝັ້ນທ່ຽງ ແລະ ຕໍ່ເນື່ອງ ຮັບປະກັນການພັດທະນາແບບຢືນຍົງ ຕາມທິດ ສ້າງເສດຖະກິດ ເອກະລາດ ເປັນເຈົ້າຕົນເອງ ໃນໄລຍະໃໝ່ ເຊິ່ງເປັນເງື່ອນໄຂພື້ນຖານຮັບປະກັນການແກ້ໄຂຄວາມຫຍຸ້ງຍາກທາງດ້ານເສດຖະກິດ-ການເງິນ ກໍ່ຄືການພັດທະນາເສດຖະກິດຕະຫຼາດ ຢູ່ພາຍໃນແຂວງ ເພື່ອແນໃສ່ການແກ້ໄຂບັນຫາຕົວຈິງຂອງພັກ, ຂອງຊາດໃຫ້ມີການຫັນປ່ຽນຢ່າງຈະແຈ້ງ, ແຂງແຮງກວ່າເກົ່າ, ເພື່ອສ້າງຄວາມເຊື່ອໝັ້ນຢ່າງໜັກແໜ້ນ ຕໍ່ການນຳພາຂອງພັກ, ການຄຸ້ມຄອງບໍລິຫານຂອງລັດ ໃນການສືບຕໍ່ນຳພາແຂວງໃຫ້ລຸດພົ້ນອອກຈາກຄວາມຫຍຸ້ງຍາກທາງດ້ານເສດຖະກິດ-ການເງິນ ໃນຕອນທ້າຍ ທ່ານ ຍັງໄດ້ຮຽກຮ້ອງໃຫ້ ເລຂາຄະນະບໍລິຫານງານພັກເມືອງ, ກຳລັງປະກອບອາວຸດ, ຄະນະພັກ, ຄະນະພະແນກ, ອົງການທຽບເທົ່າອ້ອມຂ້າງແຂວງ ປຸກລະດົມຂະບວນການປູກຈິດສໍານຶກ ກ່ຽວກັບການສ້າງຄວາມຮັບຮູ້, ເຂົ້າໃຈ ແລະ ເຂົ້າຮ່ວມການຈັດຕັ້ງປະຕິບັດ ແນວທາງສ້າງເສດຖະກິດ ເອກະລາດ ເປັນເຈົ້າຕົນເອງ ສູ່ລວງເລິກ. ບັນດາຂະແໜງການເສດຖະກິດຕ້ອງເປັນເຈົ້າການເອື້ອອຳນວຍຄວາມສະດວກໃຫ້ແກ່ຜູ້ປະກອບການທຸລະກິດ ບົນພື້ນຖານລະບຽບກົດໝາຍ, ເປັນກໍາລັງຂັບເຄື່ອນໃຫ້ແກ່ການພັດທະນາ ປະເທດຊາດ.
