ວັນທີ 12 ມິຖຸນາ 2026 ທ່ານເລຂາພັກແຂວງ, ປະທານສະພາປະຊາຊົນແຂວງບໍລິຄຳໄຊ ໄດ້ໃຫ້ກຽດຕ້ອນຮັບ ທ່ານ ປອ ອາຄົມ ປຣະເສີດ ຮອງປະທານກຳມາທິການເສດຖະກິດ ແລະ ການເງິນ ສະພາແຫ່ງຊາດ ພ້ອມດ້ວຍຄະນະ ໃນໂອກາດທີ່ລົງເຄື່ອນໄຫວຕິດຕາມກວດກາ ແລະ ເຮັດວຽກຢູ່ແຂວງບໍລິຄຳໄຊ.
ໃນການພົບປະຄັ້ງນີ້, ສອງຝ່າຍໄດ້ມີການແລກປ່ຽນຄຳຄິດຄຳເຫັນ ແລະ ຕີລາຄາສູງຕໍ່ການພັດທະນາເສດຖະກິດ-ສັງຄົມ ພາຍໃນແຂວງ, ໂດຍສະເພາະແມ່ນການຕິດຕາມກວດກາບັນດາໂຄງການລົງທຶນຂະໜາດໃຫຍ່ ເປັນຕົ້ນແມ່ນໂຄງການຂຸດຄົ້ນ ແລະ ປຸງແຕ່ງແຮ່ທາດ ໃຫ້ດຳເນີນໄປຢ່າງມີປະສິດທິຜົນ, ຖືກຕ້ອງຕາມກົດໝາຍ ແລະ ສ້າງຜົນປະໂຫຍດສູງສຸດໃຫ້ແກ່ປະເທດຊາດ ກໍ່ຄືທ້ອງຖິ່ນ.
ໂອກາດນີ້, ທ່ານເລຂາພັກແຂວງ ໄດ້ສະແດງຄວາມຕ້ອນຮັບຢ່າງອົບອຸ່ນ ແລະ ເຊື່ອໝັ້ນວ່າ ການລົງເຄື່ອນໄຫວຂອງກຳມາທິການເສດຖະກິດ ແລະ ການເງິນ ສະພາແຫ່ງຊາດ ໃນຄັ້ງນີ້ ຈະເປັນການຊຸກຍູ້ໃຫ້ແກ່ການຄຸ້ມຄອງລັດ, ຄຸ້ມຄອງເສດຖະກິດ-ການເງິນ ຂອງແຂວງບໍລິຄຳໄຊ ໃຫ້ມີຄວາມເຂັ້ມແຂງຂຶ້ນຕື່ມ.