ເພື່ອຫວນຄືນມູນເຊື້ອປະຫວັດສາດ, ການຕໍ່ສູ້ອັນຍືດເຍື້ອຍາວນານ ແລະ ພິລະອາດຫານຂອງປະຊາຊົນບັນດາເຜົ່າ, ວິລະກໍາອັນລໍ້າເລີດຂອງບັນພະບູລຸດໃນອະດີດ ກໍຄືບັນດາຜູ້ນໍາປະຕິວັດ ທີ່ນໍາພາເຄື່ອນໄຫວໃນທ້ອງຖິ່ນແຂວງບໍລິຄໍາໄຊ ແລະ ສະແດງໃຫ້ເຫັນຜົນງານການຈັດຕັ້ງນໍາພາ ຊີ້ນໍາ ຂອງອົງຄະນະພັກແຂວງບໍລິຄໍາໄຊ ໃນການປົກປັກຮັກສາ ແລະ ສ້າງສາພັດທະນາແຂວງ ໃນໄລຍະ 40 ປີຜ່ານມາ ແລະ ເພື່ອລະນຶກເຖິງຄຸນງາມຄວາມດີຂອງປະທານ ຄໍາໄຕ ສີພັນດອນ ທີ່ມີຕໍ່ປະເທດຊາດ ແນໃສ່ຮຽນຮູ້ ແລະ ນໍາເອົາແບບຢ່າງທີ່ດີຂອງເພິ່ນໝູນໃຊ້ເຂົ້າໃນການຈັດຕັ້ງ, ເຄື່ອນໄຫວ ແລະ ການດຳລົງຊີວິດຂອງພະນັກງານ, ສະມາຊິກພັກ, ປະຊາຊົນ ແລະ ຊັ້ນຄົນຕ່າງໆ ເພື່ອສືບຕໍ່ພັດທະນາປະເທດຊາດ ກ້າວຂຶ້ນຕາມອຸດົມການຂອງພັກ ຢ່າງມີໄຊ.
ໃນຕອນເຊົ້າຂອງວັນທີ 27 ມີນາ 2024 ຢູ່ທີ່ສະໂມສອນໃຫຍ່ຂອງແຂວງບໍລິຄໍາໄຊ ຂົງເຂດວັດທະນະທໍາ-ສັງຄົມ ໄດ້ຈັດພິທີໂຄສະນາ-ປາຖະກະ ຖາ ວັນສ້າງຕັ້ງແຂວງ ບໍລິຄໍາໄຊ ຄົບຮອບ 40 ປີ ( 06 ມີນາ 1984-06 ມີນາ 2024 ) ແລະ ວັນເກີດຂອງ ປະທານ ຄໍາໄຕ ສີພັນດອນ ຄົບຮອບ 100 ປີ( 08/02/1924-08/02/2024 ), ໃຫ້ກຽດຂຶ້ນປາຖະກະຖາໃນຄັ້ງນີ້ໂດຍ ທ່ານ ຄໍາແຫວນ ປັນຍານຸວົງ ຮອງເຈົ້າແຂວງບໍລິຄໍາໄຊ ຜູ້ຊີ້ນໍາຂົງເຂດວັດທະນະທໍາ-ສັງຄົມ, ມີ ພະນັກງານ-ລັດຖະກອນພາຍໃນຂົງເຂດດັ່ງກ່າວ ເຂົ້າຮ່ວມຢ່າງພ້ອມພຽງ.
