ໃນລະຫວ່າງວັນທີ 18 ຫາ 22 ພະຈິກ 2024 ທີ່ຜ່ານມາ ຄະນະໂຄສະນາອົບຮົມແຂວງ ນໍາໂດຍ ທ່ານ ອຸດອນ ສອນສຸລິນ ກໍາມະການພັກແຂວງ ຫົວໜ້າຄະນະໂຄສະນາອົບຮົມແຂວງ ພ້ອມດ້ວຍຄະນະ ໄດ້ຈັດຊຸດອົບ ຮົມວຽກງານການເມືອງ-ແນວຄິດ ໃຫ້ຄູ-ອາຈານສອນວິຊາສັງຄົມການເມືອງ ແລະ ເຈົ້າກົກເຈົ້າເຫຼົ່າ, ຫົວໜ້າຊິງຊາວ ຢູ່ເມືອງຄໍາເກີດ, ວຽງທອງ ແລະ ໄຊຈໍາພອນ.
ຈຸດປະສົງອົບຮົມໃນຄັ້ງນີ້ເພື່ອເຮັດໃຫ້ຄູ-ອາຈານສອນວິຊາສັງຄົມ-ການເມືອງ ແລະ ເຈົ້າກົກ, ເຈົ້າເຫຼົ່າ, ຫົວໜ້າຊິງຊາວ ມີຄວາມຮັບຮູ້-ເຂົ້າໃຈຢ່າງເລິກເຊິ່ງ ແລະ ກໍາແໜ້ນແນວທາງນະໂຍບາຍຂອງພັກ ກໍ່ຄືມະຕິກອງປະຊຸມໃຫຍ່ ຄັ້ງທີ XI ຂອງພັກ, ຄັ້ງທີ VII ຂອງອົງຄະນະພັກແຂວງ ເພື່ອເປັນແນວທາງການສຶກສາ ແລະ ນໍາພາປະຊາຊົນບັນດາເຜົ່າເຄື່ອນໄຫວຖືກຕ້ອງກັບແນວທາງນະໂຍບາຍຂອງພັກ ແລະ ລະບຽບກົດໝາຍຂອງລັດ ໃຫ້ໄດ້ຮັບຜົນສໍາເລັດຕາມລະດັບຄາດໝາຍທີ່ວາງໄວ້.
